Tag - СЗДСМ

ИТНО зголемување на термините и подобра достапност до специјалистички прегледи за лицата со дијабетес

До Министерството за здравство и Фондот за здравствено осигурување на Македонија

Сојузот на здруженија на лица со дијабетес на Македонија, како заеднички претставник на лицата кои живеат со дијабетес во државата, подолг временски период укажува на потребата од подобрување на пристапот до редовни, навремени и континуирани специјалистички прегледи.

Редовните контроли претставуваат основен и неопходен дел од здравствената грижа за лицата со дијабетес, бидејќи преку нив се следи текот на болеста, се проценува здравствената состојба и се одредува соодветната терапија, неопходна за успешно секојдневно менаџирање на дијабетесот.

Подеднакво значајно е и навременото реализирање на прегледите за рано откривање, следење и третман на компликациите од дијабетесот, со цел обезбедување поквалитетен, подостоинствен и поздрав живот за пациентите.

Во таа насока, изразуваме сериозна загриженост поради ограничената достапност на специјалистички термини и упатуваме иницијатива за унапредување на постојните протоколи и процедури за закажување прегледи, како и за зголемување на достапноста на континуирана здравствена грижа за хронично болните пациенти.

Особено внимание заслужува фактот што околу 4.000 лица со дијабетес тип 1 своите контроли ги реализираат на Универзитетските клиники во Скопје — приближно 650 деца на Универзитетската клиника за детски болести и околу 3.550 пациенти на Клиниката за ендокринологија, дијабетес и метаболни нарушувања.

Дополнително, во голем број општини во државата постои недостаток на доктори специјалисти – дијабетолози, поради што значителен број пациенти се принудени да патуваат во други градови и регионални центри за да добијат здравствена услуга. Ова претставува дополнителен финансиски, организациски и психолошки товар за лицата со дијабетес и нивните семејства.

Потсетуваме дека Националната програма за дијабетес 2018–2028 како стратешки цели ги утврдува:

  • поквалитетна и поефикасна превенција, рана детекција и подобрување на квалитетот на грижата и животот на пациентите со дијабетес мелитус преку подобра контрола на болеста и превенција на компликациите;
  • редовно следење и контрола на резултатите од спроведените активности, како и подготовка на соодветни анализи и извештаи.

Овие цели се од исклучително значење за лицата со дијабетес, бидејќи директно ги адресираат приоритетите што здравствениот систем ги утврдил како обврска — превенција, рана детекција, редовно следење и контрола на резултатите, што е возможно единствено преку навремени и достапни специјалистички прегледи за секој пациент, согласно медицинските протоколи.

Веруваме дека преку заедничка координација, институционална посветеност и партнерски пристап може да се изнајдат одржливи решенија кои ќе овозможат подобар, поконтинуиран и подостапен пристап до здравствена грижа за повеќе од 140.000 лица кои живеат со дијабетес во Македонија.

Навремените контроли и раната дијагностика овозможуваат:
  • превенција и намалување на компликациите,
  • намален инвалидитет,
  • помал број хоспитализации,
  • подобар квалитет на живот,
  • и спасени човечки животи.

Здравствениот систем мора јасно да покаже дека превенцијата и навремената здравствена грижа претставуваат приоритет и основно право на пациентите, а не привилегија.

Сојузот на здруженија на лица со дијабетес на Македонија останува подготвен активно да учествува во процесот на креирање одржливи решенија, преку партнерски дијалог со институциите, стручната јавност и сите релевантни чинители, со единствена цел — подобрување на квалитетот, достапноста и континуитетот на здравствената грижа за лицата со дијабетес
Read more...

Првата пациентска конференција за дијабетес успешно реализирана: силни пораки, нови партнерства и јасна насока за иднината!

На 20-ти и 21-ви март 2026 година, во хотел „Холидеј Ин“ во Скопје, успешно се одржа Првата пациентска конференција посветена на дијабетесот и најчестите коморбидитети како дел од метаболниот синдром, во организација на Сојузот на здруженија на дијабетичари на Македонија. Конференцијата, која воедно го одбележа и значајниот јубилеј – 25 години постоење и делување на Сојузот, обедини голем број учесници: лекари од различни специјалности, пациенти, претставници на институции, научни здруженија, компании и гости од странство меѓу кои и директорот на ИДФ Европа, Елизабет Дупонт, Урош Богдановиќ координатор за млади на ИДФ Европа, како и претседателите на сојузите на Србија и Бугарија. Силен одзив и значајно медиумско внимание Настанот помина во исклучително позитивна атмосфера, со одличен одзив и високо ниво на ангажираност од страна на учесниците. Конференцијата беше проследена со значајно медиумско покривање, што дополнително ја потенцира важноста на темата дијабетес како здравствен, но и социо-економски предизвик. Дводневна програма со релевантни теми Во текот на двата дена беа обработени низа теми од суштинско значење за дијабетес-заедницата, вклучувајќи:
  • современи пристапи во менаџирањето на дијабетесот
  • превенција и третман на компликации
  • улогата на примарната здравствена заштита
  • исхрана и физичка активност
  • фармацевтска грижа и нови терапии
Особено внимание привлекоа стручните сесии, работилниците и дискусиите, кои овозможија директна размена на искуства помеѓу лекарите и пациентите. Поврзување на заедницата – клучен момент Една од најголемите вредности на конференцијата беше токму поврзувањето на сите засегнати страни – пациенти, лекари, институции и компании – во заеднички дијалог. Овој пристап овозможи отворање на важни прашања и поставување на основа за идни соработки и системски решенија. Меѓународно присуство и значење Конференцијата доби и меѓународна димензија со присуство на претставници од европската дијабетес-заедница, односно директорот на ИДФ Европа, Елизабет Дупонт, како и претседателите на сојузите на Србија и Бугарија, што ја позиционира Македонија како активен чинител во регионалните и европските процеси поврзани со дијабетесот. Чекор напред кон системски решенија Од конференцијата произлегоа јасни пораки за потребата од:
  • унапредување на системските политики
  • подобрување на пристапот до современа терапија и технологии
  • континуирана едукација
  • зајакнување на поддршката за лицата со дијабетес
Заклучоците и препораките ќе бидат насочени кон релевантните институции, со цел да се придонесе кон изградба на поодржлив и поефикасен систем. Поглед кон иднината Иако конференцијата беше значаен настан, таа претставува само почеток на еден поширок процес. Како што беше нагласено и за време на настанот – борбата за подобар квалитет на живот на лицата со дијабетес продолжува, со посебен фокус на унапредување на пристапот до современи технологии, како сензори и инсулински пумпи, како и на создавање услови за достоинствен и безбеден живот. Благодарност Со оваа конференција, Сојузот на здруженија на дијабетичари уште еднаш ја потврди својата улога како двигател на промени во здравствениот систем со поддршка на над 145.000 лица со дијабетес во државата. Сојузот на здруженија на дијабетичари на Македонија изразува искрена благодарност до сите учесници, предавачи, партнери, поддржувачи и медиуми кои придонесоа за успешна реализација на конференцијата. Заедно покажавме дека кога постои заедничка визија, можни се вистински промени. ПОГЛЕДНЕТЕ ГИ СЛИКИТЕ - ГАЛЕРИЈА
Read more...

Едукативен настан: Корисноста од Системите за континуирано мерење гликемија – сензори

На 7 мај во Куманово се одржа едукативен настан во организација на Здружение на дијабетичари – Куманово и Сојузот на здруженија на дијабетичари на Македонија, посветен на подигање на свеста и едукација за животот со дијабетес, особено за лицата со Тип 1 и дел од оние со Тип 2 дијабетес. Настанот беше фокусиран на системите за континуирано мерење на гликемија (CGM) – сензори, како и инсулинските пумпи и нивното влијание врз квалитетот на животот. Присутните имаа можност да слушнат предавање за најновите практики во менаџирање и третман на дијабетесот, поддржано од компанијата Би-МЕК Медицинска опрема. Дополнително, во еден отворен и топол разговор, повеќе присутни споделија лични искуства за животот со и без користење на сензори и пумпи, што придонесе за размена на корисни информации и зајакнување на заедницата. Како дел од настанот, на дел од присутните им беа донирани CGM уреди CIBIONICS, за што упатуваме голема благодарност до Би-МЕК за нивната несебична поддршка и ангажман во унапредување на третманот за лицата со дијабетес во Македонија. Со вакви активности, Сојузот продолжува да гради дијабетес култура базирана на едукација, поддршка и заедништво.
Read more...